註冊 登錄
theZtyle.com 返回首頁
LATEST BLOG

AnnabelleCheung的個人博客 http://annabellecheung.theztyle.com [Bookmark] [Copy] [分享] [RSS]

博文

美國移民搵工篇

2019-4-6 09:25

系統分類:Life|

上一篇提到移民美國其實生活未必係想像中甘好,其中一樣最難既係搵工。唔係話移民外國之後搵唔到工,但最頭痛係想搵返未移民前既工種或者工作待遇,真係唔係想像中甘易,咪以為自己拎住個係香港既大學畢業證書,就可以好似係香港甘容易搵到份工。你會發現,原來平時成日抱怨香港打工仔生活係幾慘,真係未必係甘慘,只可以話有左比較之後,你會發現香港一切係幾甘美好!


首先,好多人會問究竟香港大學證書認受性係外國係點?其實好多公司冇話唔接受邊度既大學證書,佢地職位寫要求大學畢業,你覺得自己可以勝任既咪照apply試下都冇壞。但係美國黎講,好多公司睇完你份CV,都未必會有下文。第一,主要因為你之前既工作經驗唔係響美國當地。第二,就算同一工種,你CV上面寫既野未必係佢地需要你做既野,覺得你未夠班。不過最重要果樣,就算有電話打黎同你係電話做第一輪面試,佢會聽到你講既英文唔係佢地想要既人,再加上你果d唔咸唔淡既英文,電話面試好快就收得工,之後唔會再有下文。


係香港,就算你係大學fresh grad,一般一兩個月就搵到工。係美國,見到d大學畢業生搵工搵一年半載都係家常便飯。一旦公司裁員,就算有5,6年當地工作經驗,兩三個月先再搵到份工都係平常事。無他既,美國地方太大,所以人選實在太多,d公司又唔會好似香港d公司甘趕住請人,如果叫價夠低既香港d公司啦啦聲叫你返工添啦!美國一般返office工既面試,第一輪都會係電話同你做一輪面試,對方覺得ok先再有可能做第二輪電話面試或者親身到佢公司面試,對一個英文本身唔算係勁既人黎講,要拎到一個當地公司job offer,真係唔係甘容易。


如果要求唔高,打中國人工既話,面試會求其好多,就算做文職,都係見個面傾幾句,覺得岩就請你啦!但好老實講,唐人同鬼佬公司黎比,唐人公司既待遇真係基本上冇咩。香港講既年假,係美國叫paid time leave(PTL),香港基本入門都有7日大假,文職黎講應該係冇咩公司用緊。係美國,之前做過果間華人公司真係做夠一年先得一星期PTL!咩退休金果d,病假都冇,請人仲俾緊最低工資,仲要按時薪計,計返一個月人工仲少過香港,咩員工福利都冇之餘,一出糧仲要扣曬稅先俾你,拎住港幣一萬鬆d既人工,各種消費水平高過香港,公共交通工具落後到一個點,自己開車返工,架車一年保險,油費都唔會少得過你一年係香港住離島出黎香港島返工既費用。最重要係你要用一筆錢買架車,一般閒閒地既新車都成十幾二十萬港幣,當然你可以買二手車啦!真係未搵錢就已經要使一大筆先啦!係美國賺緊最低工資生活,頭一年做野既錢都仲未夠買架車,保險連油費。係香港,起碼你唔使白做一年先有錢落袋,公共交通方便到不得了。係美國,自己冇架車,公共交通工具唔發達既城市,根本去門口都係一個問題。係美國公共交通方便既又有幾多個城市啊?真係5支手指數得曬,冇車等於冇腳甘既道理!


仲有一樣,真係任你估都估唔到,美國係世界上數一數二既發達國家,竟然勞工法例係連產假呢d基本保障都冇,係任由公司俾唔俾有薪產假員工,公司冇規定有薪產假既話,生仔要請無薪假。真係甘都得,簡直係荒謬到一個點!香港有10個星期有薪產假,宜家進化到14個星期,仲要有8成人工,相比之下真係好到不得了啊!


成日嘈香港唔好,幾甘衰,真係移左民,面對各種新問題,係有比較之下,你可能想撲返去香港甘滯啦!


Facebook: 移居美國的港女

Instagram: 移居美國的港女


論壇地址:forum.php?mod=viewthread&tid=881486

1554

0

0

SocialTwist Tell-a-Friend

評論 (0 個評論)

facelist

您需要登錄後才可以評論 登錄 | 註冊
Private Message
驗證碼 換一個

膚質:敏感性

髮質:乾性

專業指數:0

評級了:0

心動了:0

戰利品:0

Archiver|手機版|Privacy Statement|Terms Of Use|Contact Us

GMT+8, 2019-4-24 18:44

Powered by theztyle.com

© 2008-2014 The Ztyle.

TOP