由於工作關係,得到一大疊香港冬季購物節入場卷

反正免費入場,去湊下熱鬧啦
印象中係人生第二次去咁大型既美食展
未正式進入會場,入口處已經出現長長人龍
會場職員搣入場卷搣到冇停手

場內的確係人山人海
我同我愛佬大約3點幾去到,行左2個幾鐘
迫餐死最後咩都冇買到
不過現場食左幾款小食,捧住好滿足好飽既肚走人
都叫做有促進香港消費啦

鱷魚肉羹 $10
我從未食過鱷魚肉,完全唔知鱷魚肉係咩味道
食落同瘦肉冇分別
飲完碗熱野,身心即時暖晒

串燒三丸 $20
冇記錯應該係貢丸,花枝丸,墨魚丸
唔好以為係好普通既三粒丸
特別之處係每粒都有大約兩個乒乓波咁大
第一次食咁足料,咁大粒既丸
如果一個人一次過食晒三粒,肯定會有飽肚感覺

鮑汁魚蛋 $10 / 8粒
我愛佬話冇味
味道的確係冇咩特別
可能煮得唔夠耐,鮑汁只係魚蛋表面,滲唔到入裡面
不過好彩佢冇乜魚腥味

糯米糍 $13 / 3粒
買左莫加咖啡,豆腐芒果,黑芝麻3款味道
黑芝麻口感最特別,個皮係蝦餃皮?
不過我諗如果再雪凍少少會更好味

另外仲食左肉丸拼雞串 $20
愛佬讚肉丸好味
我就比較鐘意食雞串

唔知大家有冇去到呢?
有冇拎住一袋二袋收穫回家?