自從出左上一篇blog文「急症室一夜」(重溫按此)
收到好多表示關心既回覆 / 留言
婷婷在此衷心多謝每一位
請放心,我宜家精神,身體狀況都好返好多
亦正考慮做唔做個詳細身體檢查
考慮中……考慮中……

入正題,今篇文想先推介一款好味零食比大家

日本松尾黃豆粉湯圓夾心朱古力
$13.5 /  共9粒
購自7-11


搵左好幾間7-11先搵到
建議大家去大間7-11買,細鋪可以唔洗去

我係非常鐘意食口感煙煙韌韌既食物,糯米糍,湯圓等等我至愛!
面層係勁似花生醬味道既朱古力
而中間係疑似湯圓夾心,如果煙韌程度5分滿分,我會比佢1分
開頭我見包裝袋印住大大粒湯圓,以為真係會好煙韌
結果食落唔知係我諗錯左,定係貨不對辦啦
不過如果當佢係粒朱古力食,食到中間有少少咬口既野做夾心
口感又幾特別,好味
而且味道唔會好甜,食多兩舊都唔覺漏

再比大家睇睇殘酷既現實 - 食物營養標籤


老實講,十居其九零食都唔會係健康
我自己好少食零食,多數都係食糖
只要自己食得適可而止,唔咪暴食零食,唔食正餐
間中過一過口癮都無妨

接住想同大家分享一件生活小記
由於工作關係,認識到一對公公婆婆
同佢地逐漸多左接觸
佢地每次見到我,都會同我打招呼
婆婆仲會拖住我,輕輕攬一攬我
有時又會買零食 / 生果請我食
近排仲親手整野比我食,有糯米包,有馬拉糕
味道好有水準


唔知係唔係因為佢地無兒無女,覺得同我有緣呢?
有一次婆婆仲衝口而出叫我契女
或者哩d就係生活上既好人好事
每次諗起都會有種幸福既感覺

歡迎同時瀏覽我的Yahoo Blog : http://hk.myblog.yahoo.com/ting-beauty 
                                                         (零食推介 + 生活小記)