theZtyle.com

查看: 3126|回覆: 2

小小化妝師追夢記(一)之 第一次學化妝失敗篇 [複製鏈接]

Rank: 6Rank: 6

帖子
1127
發表於 2015-2-1 23:58:19 |顯示全部樓層


好耐好耐好耐無寫blog分享近況!! 我諗追開我blog既朋友仔都走哂lu~~ 哈哈哈!!
不過唔緊要!! 我決定一有時間就寫返blog, 而今次仲要係寫好多女仔都有興趣知道既野:化妝師血淚史!!
我知道我知道, 大家對呢行都充滿幻想, 以為可以幫人扮靚靚之餘仲有錢收, 肯定正到爆!?
咁就等我呢位小小化妝師都同大家講下呢行既苦與樂啦!
呢個「小小化妝師追夢記」仲會係連載式寫落去架!!
以下係我既Facebook Page, 有我既化妝作品, 大家有興趣都可以昅下~
www.facebook.com/CandyHoDreamyMakeup

小小化妝師追夢記(一)之第一次學化妝失敗篇

話說我本身只係一位普通OL,係同一間細公司做左5年!! 無錯!! 係5年!! 無轉過工~
由岩岩畢業19歲做到24歲, 我以前覺得自己直頭願意係呢間公司做一世!!
無他既...... 我唔鍾意做大公司, 個人比較摺, 又無咩雄心壯志, 平淡是福嘛~
可惜, 每日返工放工唔洗特別OT唔洗辦公室政治食飽飯上下網既Hea爆日子quota隨住年資而full左......
有D野用得太盡原來真係要還架!!
算係睇住我大既鬼佬老闆開始有說話我聽, 覺得我要幫公司做多D額外野, 要學多D野增值自己, 加人工俾我先會值得!
我個時真係好糾結...... 我無大學學歷, 又唔鍾意坐定定讀書 (如果讀到既話唔洗等而家啦~) 但又無咩特別技能......
幻想到將來可能最多搵萬六七蚊人工, 感覺自己真係有D廢...... 所以不得不正視下呢個問題!!


當時有位傾得埋既同事, 佢建議我與其勉強讀個top up degree, 不如正正經經學樣自己喜歡既野增值!!
我真係諗爆頭, 話說我個人本身所有興趣都只係維持到3分鐘, 可能多少少......
有一日突然醒起, 我最堅持既野就係每次約朋友或者愛人出街, 我可以幫自己花兩個鐘執正個樣喎!!
幫人扮同幫自己扮應該差唔多姐...... 呵呵!!
諗到就去做!! 立即上網搵化妝學校, search下做化妝師既出路, 做左好多research架都~
之後的起心肝報我第一間化妝學校!!


由於當時未知自己究竟想化Media/Creative/Bridal妝, 所以報左某間都幾有名氣既化妝學校, 學個「入門基本班」先! 亦係我第一個化妝課程~
當時一個基本班得唔知7-8堂, 要$6000! 對於我呢個守財奴泥講真係好肉尺...... (但由於我就係一個唔捨得洗錢既人, 所以對我之後轉行真係好大幫助, 繼續睇落去啦~)
但想求變就要去馬!! 我突然變得好有心機去做一樣野!
當時放工就飛去上堂, 不過呢間學校老實講...... 真係唔得......
一班好似8位學生(唔太記得), 老師示範完就由助教睇住咁多位學生, 講真我當時既性格比較內向, 就算唔記得D step或者唔識化都無出聲(而家諗返覺得好死蠢! )
基本上每堂老師示範完之後, 就到自己做, 再檢視「成果」, 但無奈助教其實係睇唔哂咁多位學生, 所以過程當中我究竟手勢岩唔岩, step有無漏或者錯, 根本無人知...... (所以而家到我教學生時, 設身處地去諗, 其實基本班先係要投放最多人力資源落去, 如果連基本野都無學得好, 仲可以點上去? that's why我鍾意開單對單或者小班教學既原因)


基於我當時對呢行充滿住美好幻想, 就算第一堂化到model塊面灰白、第二堂送條小虎眉俾model我都無咩灰心!!
直到呢個課程一堂一堂咁過, 去到尾聲我發覺有唔妥...... 我覺得我對makeup呢樣野認識仍然好空泛......
可能我咁講有少少太過, 因為學野的確無話包學識, 同埋都要講天分, 仲要勤於練習等等 (下刪一百個因素)
但當時的確我既感覺係:無咩野落過袋咁... (我仲同同事講應該係我無天分, 唔學喇~)


印象中好記得有一次返學校練妝, model係我舊同事泥既, 佢係細眼兼單眼皮, 搵model好唔容易架! 就算難化都照化啦! 話說老師無教過點樣痴雙眼皮(呢個課程係唔包), 但自己又好想幫model整大對眼, 反正只係練妝姐, 就用平時自己上網睇既技巧用膠水幫model痴個雙眼皮出泥啦!! (我仲以為自己好醒 ) 最後當然係一pat屎咁啦, 仲痴到model成個眼皮都係膠水積!! 大檸樂......   呢個時候老師竟然突然殺出見到呢一幕, 係我身後大叫「都話左唔係咁整lor!!」嚇得我丫...... 真係尷尬死! 最好笑係老師講完呢句之後就又消失左! model話:「你老師都好搞笑, 話完你但又唔教返你! 想點呀?」同意1000000次~


自此之後, 我知道係呢位老師同呢個教學模式唔夾我~ 未必關天分事既!!
我既意志竟然無被磨滅, 仲好似燃起左成世女從來未有過既一團「火」!
講笑, 其實只係當時已經添置左唔少化妝品, 唔想就咁side左囉!!


係呢間學校唯一最大既得著就係我認識左兩位好朋友, 佢地而家都係化妝師泥架! 其中一位仲係同我夾租workshop既partner呀~   我在此叫佢做R, 下一篇我就會講我同R齊齊再報過新既化妝課程, 正式開展我地既化妝路呀!

第二篇會加返少少插圖, 因為第一次學化妝既作品真係慘不忍睹, 我都係保障返model咋~

www.facebook.com/CandyHoDreamyMakeup
歡迎留言啊~ ^^



博文地址:http://www.theztyle.com/home.php ... 1&do=blog&id=268797

Rank: 6Rank: 6

帖子
10
發表於 2015-2-4 10:37:45 |顯示全部樓層
學化妝,除了要審視課程內容,老師質素都好重要喲!

個人認為您果個老師好冇禮貌,又唔因應您model情況幫您/教您點處理

Rank: 6Rank: 6

帖子
1127
發表於 2015-2-5 19:19:52 |顯示全部樓層
Exactly~~ 我個時都O哂咀呀! XD XD
您需要登錄後才可以回帖 登錄 | 註冊

Archiver|手機版|Privacy Statement|Terms Of Use|Contact Us

GMT+8, 2018-9-22 13:04

Powered by theztyle.com

© 2008-2014 The Ztyle.

TOP